مصر تنادى فهل من مُجيب ؟
نادت مصر شبابها : ساعدوني كثر الفســاد و الفقــر و الذل بأهلي فهل من ثائر ؟؟ هل من مساعد .. هل من مُجيب ؟
جاء يوم 25 يناير و لبى شباب مصر و كافه أبنائها النداء من طفل يبلغ نحو 10 سنوات إلى عجوز في الثمانين و أكثر, عندمــا كنت في الميدان ليله النصــر في جمعه الغضب 28-1 شعــرت كأنني ولدت من جديد ... لأول مــرة في حيـــاتي أشعـــر بالفخــر لأنني مصــرى و أن المصريون حققوا إنجازا عظيمــا غير الفوز بكأس الأمم الإفريقية .. كــان شعوراً لا مثيل له .. رأيت المصريين كافــه ! ... بكل طوائفهم
|
مسلمين و مسيحين وطن واحد ايد واحده |
مسلمين ومسيحيين , أهلاوي و زملكاوي.. رأيت كافة الأطياف السياسية من إسلاميين و ليبراليين مرورا بالاشتراكيين و العلمانيين الكل كان ينــادى " الشعــب يُريد إسقــاط النظــام " ... نفس النداء .. نفس الهدف ... نفس الروح ... لأننا في نفس الوطن و لدينا نفس الجنسية و نفــس الدم .. واليوم أشبه بالبارحــة .. 9 سبتمبر مصــر تنادى : سجنوا أولادي و حاكموهم ظلماً وزوراً .. بيحكموهم في المحاكم العسكرية و هما مدنيين .. حتى لو ابني ظلمني و عصاني مش عــاوزاه يتحاكم عسكرياً عاوزاه يتحاكم محاكمه عــادله ذي كــل النــاس و الشباب ولادي الى ذي الورد إلي بيقولوا كلمــه حــق يتحكموا عسكريــا ليه ..؟ و يتحاكموا ليــه أصلاً ياولادى بكرر ندائى فهل من مُساعد ... هل من مُجيب ؟
يا تري هنسمع نداء بلدنا و نفضل كــده ؟ نفــس النداء .. نداء الحرية و العــدالة الاجتماعيــة يا ترى ياشباب مصر هنلبى النداء و لا هنفضــل كل واحد فى فصيل و شايف التانى عدوه !! ... ليه و أحنا لينا نفس الهدف ؟!! " عيــش حرية عدالــة اجتماعية " !! ... ليه نبعد عن بعض ؟ ليه منرجعش روح الميدان من تــاني ؟ مسلم يصلى و مسيحي يحمى ظهره !! . هو دا الميعـــاد .. 9 سبتمبر 2011 ... جمعــــه لم الشمل و توحيد الصف ..جمعــه الوقوف ضد الظلم و ضد المحــاكم العسكريــة ... كــل واحد افتكر إن الثورة انتهت بسقوط الحــرامي يبقى غلطـــان .. مفيــش ثورة بتنتهى بعد 8 شهور !! .. هو مش سلق بيض !! .ثورة فرنسا استمرت 10 سنيين عشان إقامة العـــدل ... ياترى المصــري هيكافح لغاية فيين عشان حريتــه ؟ .. ولا هيستسلم للظلم إلي بقاله 60 سنـــه , مصــر تنادى فهل من مُجيب ؟. |
ليه مننزلش ... أنا إسلامي و أنت ليبرالي .. شركاء وطن واحد آه ممكن نختلف في أيديولوجيه دا طبيعي ... لازم يبقى فيه اختلاف لكن مايبقاش فيه خصومه و عداوة !! .. الإختلاف فى الرأي لا يُفسد في الود قضيه ... إلى بينا و بين بعض أكبر من كل دا .. إلى بينا و بين بعض دم و كيان واحد و أرض واحده ....لازم نوحد الجبهة و نعرف عدونــــا إننا مستسلمناش .. وإننا كلنا " أسماء محفوظ , و محمد عبد الغنى و نور أيمن نــور و غيرهم و غيرهم من شباب مصــر إلى قالوا كلهم كلمه الحــق ... لازم يعرف عــدونــا إن الثـــــــــــــــــــــورة مستــــــــــــــمرة .. مصــــر كلها رجـــاله إلى عبروا و بنوا الهرم وبنوا السد .. وبهروا العالم بثـــوره على استعداد للدفــاع عن ثورتهم إلى ضحى فيها فوق ال 4000 شهيد و مصــاب و ما خفى كان أعظم ...
|
الثورة الفرنسيه استمرت 10 سنوات |
آخر شهداء محمد مُحسن قال عن الشهداء آخر كلمه قالها " يانجيـــــــب حقهــــــــــم يا نمـــوت زيهم " فستجاب ربنا ليه ورزقه الشهــادة لما سأله احد الزملاء في موقعه العباسية شكلهم ناويين يموتونا قال " دى تبقى أحسن موته " هما دول ولاد مصـــر ... الرجاله إلى بينزلوا مش إلي بيقعدوا علــى المكاتب و بيساوموا على دم الشهــداء ... أفيقوا يرحمكم الله ... 9 سبتمبر قـــــــــــادم يا مجلـــس ... أنا هنزل أدافع عن حقي و حــق كل شهيد و حــق كل مصري في انه يتحاكم قدام محاكمة عادلة مدنيه عاديه عشان أحنا مش عسكـــر عشان نتحــاكم قدام محاكم عسكرية !! . سامــــع أم شهيد بتنادي أوعوا تنسوا حــــق ولادي , أيد واحــــــــــدة , لا لمحاكمات العسكريــة و غيرها من الشعارات إلى لازم تترفع يــوم 9 سبتمبر ... لازم ننسى الخلاف و نفهم قوي أن التفرق ضعف و الإتحاد قوه .. لازم نعرف أن كلنا مصرين وهدفنا واحد , أنا معنديش أى مشكله برغم كوني ليبرالي ديمقراطي إن الإسلاميين يمسكوا الحكم إذا أخذوا الأغلبية طلاما فيه نظــام عــادل و تبادل سلمى للسلطة و صندوق انتخــاب و كل المصــريين ميختلفوش على دا !! و لكن دا عمــــرة ما هيحصل طول ما فيه ظلم ... أنا نـــازل البي النــداء يوم 9 سبتمبر عشـــان أطالب بإلغاء المحاكم العسكرية للمدنيين و أوضح أن المصريين كلهم أيد واحـــده .
مصـــر تنـــــــادى فهل من مُجيـــب ؟ .
تحيــــاتي ,
محمد نبيــل
|
فعلا حاجه صعبه جدا الاحكام العسكريه على المدنيين .. ربنا معانا
ردحذف